THE COMMON PEOPLE BANTS


My Country People, I hail o!

I don come again. In fact, WE don come again because I dey always yarn the mind of the people. I just dey my own side dey boss when I come stumble upon one article for Nigerian Punch Newspaper. Dem record one ogbonge headline

       'EIGHT POWER PLANTS SHUT DOWN ... ZERO GENERATION RECORDED'

Na hin I open the article o to see wetin dem wan talk. After reading through, I come realize the saying that

      'Show me your friends and I will tell you whom you are'

I know say some of una go dey wonder how the adage take relate.

First of all, dem lagos people vote bros fashola into government. First term, he do plenty things. He amaze us. Hin gist spread round the country. Everybody dey hail am. Some talk say he no plan all those thing but he carry out the things wey tinubu don put for ground before he left. But how that one take concern us? The thing be say he sha do plenty good things for Lagos people. Anytime I dey Lagos, I dey always happy and I dey always enjoy the BRT ride when it first come out o because now the BRT buses don resemble Molue bus o...the buses don dirty and ugly. We dey enjoy the good roads and as everything dey organized. Even the LASTMA and LAWMA make sense and everybody praise am.

Second term come and he relax but we no talk or mind because we know say the guy try well well for first term. We no fit deny say second term, he chop money but we no wan talk because he sha try for first term. So, we zip our mouth. So, when bros buhari talk say he wan make am Minister of Power and Works and all those kind yeye post, we dey happy because na electricity he go dey in charge of. We dey happy because he don allow us trust in his integrity when he serve as governor. I don happy say at last, Nigeria go get stable electricity because a good man don enter.

Naso we borrow pose dey watch bros fashola and na so he release the first bomb wey all papers carry am and I trust Channels TV, dem help us break the news down in bits. I dey house dey watch o. He talk say he don increase tarrif or one kind yeye yarn and say make we pay before dem do light. Na hin people come dey strike and everybody anger rise. Me I no too comment o. I just dey watch until dis evening when I read this headline and I just say make I ask bros fashola

    'WETIN! WETIN!! WETIN SEF!!! AHAN!!!!'

You dey sleep? But I no too blame am because he dey APC camp. Na APC camp talk say bros buhari no get money when he serve naija for military regime. So maybe he wan come pack all the money wey he no pack during the military reign...bros buhari miss road gannnn...but my talk na under 'maybe' o. No go misquote me. Anyway, so wetin come do bros fashola wey he just dey disappoint like this? This is why we need leaders wey fear God. Because all these people no fear God. Na money dem fear.

How you go take perform when you be governor and you no perform when you get bigger position. How you go allow things pafuka for your hand. You see why God no dey gree elevate some people because some people no sabi how to dey responsible. Please bros fashola, do all you can to stabilize power if not, paper plenty...you fit resign if the work big pass you. Thank you sah. Nigerians, make we dey pray for him o.

WE WILL KEEP BANTING TILL EVERYTHING IS ALRIGHT!

I REP THE COMMON PEOPLE OF NIGERIA!

Share this:

CONVERSATION

0 comments: